Oleh : Widya Ishak
Mahasiswa Program Studi Sejarah Peradaban Islam Fakultas Ushuluddin Adab dan Dakwah IAIN Ternate
Papa pung para-para, dan Mama pung tungku dapur adalah tampa yang sama-sama ada dia pung asap. deng api yang dari tampa itu torang di ajarkan untuk hidup karas, deng jang bamanja.
Papa, papa rela baujang deng bapanas demi torang ana-ana pung hidup
Mama, mama dorang rela bapanas di tungku deng api manyala sampe-sampe Mama pung mulu Kase jadi kipas tiop api, dan Mama pung tangan dong kase jadi gata-gata sio Kona……..
“Mama……. Papa……. sayang eeee….”
Torang…., torang sebagai dorang pung ana jang talalu banya lagu untuk mau iko orang-orang kota pung gaya.
Torang ya, tetap torang anak petani, anak desa, anak kampong tetaplah hidop deng kesederhanaan yang apa adanya.
Kalu dalam pikiran kong muncul bayang-bayang untuk bagaya bak anak kota, maka Torang harus inga Papa pung para-para deng mama pung tunggu dapur yang rasa-rasa mau tabakar hanya karena mau Kase hidop deng kase skolah torang dorang rela bapanas kasiang.
Dorang sampe lupa waktu istirahat, waktu makan deng yang lain itu karena dorang mau torang tarausah rasakan apa yang dorang rasakan.
Papa deng peda (PAPEDA) di tangan, Deng mama juga soloi di balakang dorang bajalang Pi kabong yang torang ana-ana sama skali tara tahu kalau dorang pigi itu su ba alas ka bolom.
Jadi, kalu su pigi barantau atau su pigi skolah di luar daerah, itu harus Katong bainga mama deng papa pung lala.
Memang torang hidop jauh dari orang tua ini juga barat tapi jang sampe torang menyerah, sebab Papa pung para-para deng Mama pung tungku dapur akan manangis jikalau torang pulang bawa kecewa untuk Papa deng mama.
Kuncinya, torang harus kuat deng sabar yang orang Makeang bilang
“Hakaklida Meu Noma” itu kalu Torang bakuat, sabar, Deng Kase tambah tawakal itu Tuhan juga akan Kase jalan.
Intinya, torang harus lia sejarah dari Papa pung para-para deng Mama pung tungku dapur yang selama ini su kase torang banyak pelajaran hidop, agar torang harus maju dan buktikan kalu torang yang basar dari papa deng mama petani pung bisa sukses.(*)
